Mir überchöme nassi oder chauti Füess! U das nid vor Angscht vor äm Hürate sondern vom Hochwasser! Ds Wasser strapaziert d Närve vo 4 Hüratswillige im Seeland! Aber nüt cha üs därvo abbringe - JETZT WIRD GEHEIRATET!

U zwar gö mir morn mau go luege wie üsi Trouzüge im Engadin zivil hürate. He dir 2, mir wünsche öich nume ds Aueribeschte für d Zukunft ds Zwöit u natürlech chessuwies Liebi! Mir fröie üs därbi dsi u merci vieu mau für öii Fründschaft! Auf die Liebe - TACH!

Karin + Martin Schneeberger - Schumacher

P.S. Ig fröie mi natürlech sehr, das där Titu "Frou Schumacher" irgendwie wieterläbt ;-)

Fertig - ig ha Tischchärtli, Namensschiudli u us dä Abschnitte vo mim Hochzytschleid Automäscheli baschtlet. Jetz isch där Liem troche, vo dä Finger furt chratzet u mir si wieder ä Schritt nöcher a üsem Hochzyt - äs geit würklech jetz nüme lang (judihui, biber, biber - bi ganz hin u här grisse!). Chunnt scho guet - ig fröie mi uf jede Fau sehr druf!

Hie no mau ä letschti Föteliuswau vo üsem Pouterabe - när wär de das Kapitu Pouterabe abgschlosse:

Där Bruch vo dä Hochzytsschütze seit, dass nöii Mitglieder ä Ufnahmeprüfig müesse mache u die Ufnahmeprüfige finge jewiels a Pouterabende statt. A üsem Pouterabe hei säch dere füechtfröhliche Ufgab där Mischa u där Marco gsteut, die beide hei das super gmacht u sie si würdigi Nachfouger für die 2 abträtende Hochzytsschütze! Bravo Mischa u Marco!

Hüt i 2 Wuche isch äs scho sowiet - läck, isch die Zyt jetz schnäu värbi gange! Ig fröie mi wie verruckt wes de ändlech sowiet isch u glichzytig wirde ig äuä de glich chli närvös, aber das muess äuä so si! Uf jede Fau si mir gloub langsam Rächt guet organisiert: Mir hei aues bsteut (ässe u trinke), mir hei ä Hochzytsturte, mir hei üsi Kleider parat (ämu fasch, Tinu müesst no luege ob sini Hose zläng si mit dä Schueh oder nid u ig ha no mau ä Kleidaprob nach däms gnäiht isch worde), mir hei ä coole Pouterabe erläbt (wes ufrume nid wär, miech mä so öppis no meh - sagt mein Mann!), ig ha fertig baschtlet (äs het nid gnue gä zum baschtle, drum het där Tinu nid müesse häufe - sorry Andy ;-), ig ha ä Probetermin gha zum frisiere u schminke - das chunnt gloub guet - jetz hoffe mir uf schöns Wätter a üsem Hochzytstag u natürlech immer i üsere Ehe! Das hani schön gseit oder? ;-) Bis gli i däm Fau, no 14 Mau schlafe. Liebi Grüess vo mim Ma u vo mir