Äs isch jetz höchschti Zyt üses Wettbüro ufzmache. D Frag lutet natürlech:

ÜBERCHÖME MIR ÄS MEITELI ODER Ä BUEB?

Du chasch unger Kommentar Di Gschlächtertip abghä, natürlech Di Name nid vergässe. We de üses Spätzli da isch, verlose ig unger aune richtige Tips öppis Chlises.

Faus Du no meh wotsch tippe, chasch ou no ä Namenstip abghä, faus Du ou no där richtig Name würdisch tippe, lade mir Di und Begleitig zumene Nachtässe bi üs i.

Das wär aues, där Rächtswäg isch natürlech ausgschlosse .

Am Bébé sis Zimmer isch jetz auso bezugsbereit. Wies genau usgseht ghört aber nid hie inne. Faus Dus wotsch cho aluege, darfsch das, aber de muesch mau bi üs värbi cho! Eis verrate ig no - äs isch weder ROSA no HÄUBLAU igrichtet - aues ganz schön neutrau!

Läck hani dä Schnee langsam gseh! Am Dsischtig früsch frisiert us äm Hus - äs het Sturm, am Mittwuch früsch frisiert us äm Hus - äs schneit, ds Auto abbürschte u chratze u das obwou ig nüme so nöch ads Auto häre mah! Hüt hani drus glehrt, nid früsch frisiert - äs schneit wie verruckt, Auto abbürschte, ohni chratze - abgfahre, äs Chaos uf där Strass dä irgendeine mit 30 ungerwägs isch, därbi wäre d Strasse gar nid rütschig gsi. Läck hani dä Winter gseh - ds Bébé u ig wöi jetz Früehlig!!

Letscht Fritig bi ig bim Arzt gsi zur Kontroue, mi Buch isch vermässe worde, ds Härzli vom Bébé het er abglöst u gmeint: Äs geit ihm guet! Isch doch äs schöns Gfüehl. Jetz geits bis zum erächnete Termin no 5 Wuche - mau luege wes de ou würklech chunnt! Mir geits immer no guet, ussert das ds Bébé mir scho Rächt ufs Becki drückt u das isch mängisch müehsam, aber jammere wett ig auso de gar nid. Auso, bis zum nächschte Mau...