Das isch so ä träffende Artiku - erklärt wahrschinlech mini erhöhti Luscht uf Schoggi där Momänt  oder wärum där Papi jede Abe hocherfreut erwartet wird!

Mir wünsche aune ä schöne Nationalfiertag!

Üsi Wösch- u Glettifrou ;-) isch geschtär im Isatz gsi, erstunlech wär vo üs am meischte Chleider i sim Chorb het!

Jetz isch üses Meitli scho zwöi Mönät aut (wahnsinnig wie schnäu d Zyt vergeit!) u jetz wo mir ganz guet organisiert u igrichtet si, gniesse ig mis nöie Läbe i voue Züg. Bi zwar vieu lieber Mama aus Husfrou ! Da üses Töchterli fasch jedi Nacht 8 oder 9 Stung schlaft, gits am Morge ersch so uf die haubi 8ti/8ti Tagwach, so überchume ig gnue Schlaf u ha würklech Ferie. D Julie u ig ungernähme sehr vieu zäme, träffe üs mit liebe Fründe u gniesse ds (meischtens) schöne Wätter dusse. Eigentläch si d Täg für üs vieu ds churz u d Wuche gö so schnäu värbi. Aber natürlech fröie mir üs immer no sehr ufs Wucheänd, denn da isch där Papa ou däheime!

Ha mini Tochter scho ids Shopping-Läbe igführt, doch leider isch sie no nid so där Shopper - jedes Mau we ihres Wägeli stiu steiht, um öppis ds luege isch sie gar nid zfriede - aber mir schaffe drane (meh vo däm de äs angers Mau). Chleider u Schueh het ds Julie scho fasch so vieu wie d Mama!!

Drum hoffe mir jetz uf äne superschöne, warme Summer u das no lang nid September isch .

So, wie versproche hei mir aui richtige Meitli-Tips (gemäss Itrag Top die Wette gilt - 5 Persone hei uf änes Meiteli tippet) uf änes Zedeli gschriebe u unger notarieller Ufsicht

die Uslosig vorgno. D Glücksfee isch natürlech d Julie gsi - das Zedeli wo sie aus erscht berührt het, het gwunne.

Et voilà - and the winner is...

Härzlechi Gratulation - Marianne W. - wie versproche berchunsch Du bi nächschter Glägeheit äs chlises Gschänkli.

Ei Tip hei mir nid chönne mitzeue, da er ds spät abghä isch worde - guet ig ha nid gschriebe, bis wenn mir Tips entgäge nähme, isch mi Fähler! Ig hoffe mir chöi üs mit där beträffende Familie ussergrichtlech einige .