Liebi Julie

Mängisch chanis fasch nid gloube, we ig Di so aluege, Du näbe üs im Bett liegsch oder bi üs am Tisch i Dim Stühli sitzisch - Du bisch üsi Tochter! U üses gröschte Glück! Das Gfüehl chame nid beschriebe, wo säch i mir breit macht we ig Di äbe so aluege! Liebi Julie - ig bi so gärn Dini Mama u äs git nüt wichtigers für mi im Läbe, aus das äs Dir u Dim Papi guet geit! Drum bliebet xsung, luschtig u gniesset ds Läbe!

IN LOVE Dini Mama

Üsi Wösch- u Glettifrou ;-) isch geschtär im Isatz gsi, erstunlech wär vo üs am meischte Chleider i sim Chorb het!

Mir si eifach schwär verliebt i üses Töchterli!

Uf d Frag "geits mit stiue?" oder no schlimmer ganz vorwurfsvou "stiusch nid?" reagiere ig mittlerwiele agressiv. Grad aus hätt ig mir das usegläse, dass mir nid chöi stiue! Nach äre Stiukrise u chli Babyblues bi ig jetz drüber wäg, dass üses Ching mit äm Shoppe ufwachset. Ha mir igredt, kei gueti Mama dsi, we mä nid cha stiue, das isch jetz dank äm guete u liebe Zuerede vo mim Ma (merci Spätzli) düre u d Houptsach isch für üs sowieso, dass äs üsem Julie guet geit u sie xsung isch u das isch so!

Das ds WHO aber glich zfriede isch, pumpe ig jetz das Wenige a Muetermiuch no ab u üsi Tochter gniesst ei Mauzyt pro Tag mit äm beschte u xsündschte vor Wäut - ar Muetermiuch!! Maches nid mit Liedeschaft, die Pumpmaschine isch schrecklech - aber für mini Tochter mache ig fasch aues!

Mi Tip a aui Schwangeri, wo gli mau ds erschte Ching überchöme: Löt öich vom Stiue nid la stresse - wes nid geit, de geits nid.

Üse Papa isch ämu ganz happy u cha ou shöppele

Sit am Fritig het üse Verein ä nöie Presidänt - natürlech si ds Bébé u ig sini gröschte Fäns! Machs guet Presidänt, lass Dich nicht unterkriegen und dänk immer dra - YES YOU CAN!!